Man U Ta Sayi Carvalho? Lionel Messi Ya Nuna Babu Kamarsa, Yayin Da Wayne Rooney Ke Ci Gaba Da Murnar Kwallon Da Ya Jefa Daga Tsakiyar Fili - 24/3/2014

WASHINGTON, DC —  Lionel Messi, ya nunawa duniya cewa a yanzu kam fa, duk da raunin da yake fama da shi, babu wani dan kwallo kamarsa a duniya. Kwallaye uku da ya zura a ragar Real Madrid jiya lahadi, sun taimaka ma Barcelona ta yi nasara a wannan wasa da aka ce bana dai kam a Turai ba a buga kamarsa ba.

Wadannan kungiyoyi biyu, Barcelona da Real Madrid, babu kamarsu a duk Spain, kuma abokan tsamar juna ne tun asali.

Mako gudan da ya shige ya taho da kyakkyawan labari ga magoya bayan kungiyar kwallon kafa ta Manchester United. Misali, kwallon da Wayne Rooney ya jefa a ragar ‘yan West Ham tun daga tsakiyar fili, kamar wani kwallon da David Beckham ya taba jefawa United a wasanta da Wimbledon ne wasu shekarun baya. Rooney yace ya ga wancan kwallon, amma nasa ta sama ya jefa, ba wai ya gara ta a kasa ba ne.

A bayan wannan nasara da kuma doke Olympiakos da United ta yi, manajanta David Moyes sai tsallen murna yake yi, amma fa gobe akwai wani karon na batta a tsakanin United da makwabciyarta City. City ta lashe wasanni biyun da suka kara a Old Trafford.

Ana cikin haka kuma, sai ga labarin cewa United ta sayi William Carvalho daga kungiyar Sporting Lisbon ta Portugal a kan kudi dala miliyan 62 domin ya mata wasa a kakar kwallo mai zuwa.

Babu Kamar Lionel Messi; Man U Na Cike Da Farin Ciki - 1'00"