A kasar Turkiya, an soma shara’ar mutane 220 da suka hada da manyan hafsoshin soja 26 masu mukaman janar-janar, wadanda ake zargi da taka rawa a yunkurin juyin mulkin da aka so yi a watan Yulin shekarar da ta gabata.
WASHINGTON DC —
Daga cikin wadanda aka gurfanar a gaban kotu harda General Akin Ozturk, tsohon babban kwamandan mayakan jiragen sama na kasar.
Turkiya dai tana zargin wani hamshakin malami dan kasar Turkiya dake zaune a nan Amurka mai suna Fethullah Gulen da laifin kitrsa makircin yunkurin juyin mulkin na ran 15 ga watan Yulin 2016, wanda mutane fiyeda 260 suka rasa rayukkansu a cikinsa.
Gulen dai ya musanta zargin cewa yana da hannu cikin lamarin.
A jiya Lahadi ne kuma shugaban Turkiyar, Recep Tayyip Erdogan ya kara tsawaita dokar ta-bacin da aka kafa tun bayan yunkurin juyin mulkin na bara.
A karkashin wannan dokar-ta-bacin ne aka kame mutane fiyeda 47,000, sannan an kori wasu 100,000 daga aiyukkansu a bisa tuhumar cewa sun taka rawa cikin yunkurin.