Wani hatsarin kwale-kwale yayi sanadiyar mutuwar mutane 4 a garin Dikwa, na jihar Borno.
Kakakin rundunar ‘yan sandan jihar Borno, asp Nahum Daso yace sun samu rahotanni daga shelkwatar ‘yan sanda dake Dikwa cewar, wani hatsarin kwale-kwale ya afku a jiya Litinin da misalin karfe 3 da rabi na yamma a yankin Bakassi, tsakanin Mafa da Dikwa dake kan hanyar Maiduguri, dake jihar Borno.
Al’amarin ya hada da wani kwale-kwale dake dauki da fasinjoji wanda ya nutse a cikin ruwan ambaliya, abinda yayi sanadiyar mutuwar wasu mata 4.
Hatsarin ya hallaka mutane 4, dukkaninsu daga mazabar Bulabulin, dake Dikwa.
Ya bayyana sunayen wadanda hatsarin ya rutsa dasu da ya Mallum Shettima, babbar mace daga karamar hukumar Marte da Maimuna Akura, mai shekaru 10, da Umira Alhaji Bulama, ‘yar shekara 6 da kuma yagana Bulama Kawu, mai watanni 5 da haihuwa.