Za'a yi ma dan wasan gaba na kungiyar kwallon kafa ta Tottenham Harry Kane tiyata, inda zai tafi jinya na tsawon watanni hudu har zuwa watan Afrilun 2020.
Dan wasan mai shekara 26, da haihuwa ya samu rauni ne a cinyarsa lokacin wasan da suka yi da Southampton cikin sabuwar shekarar nan ta 2020.
Kane ya fafata wasanni har guda 31 wa Tottenham, inda ya samu nasarar jefa kwallaye 27 a raga, cikin dukkan wasannin da ya buga a wannan kakar wasan.
Cikin wasanni da Kane ba zai buga wa Tottenham ba, sabo da jinyar da zai yi, akwai gasar zakarun Turai UEFA Champions league 2019/20, zagaye na 16, wanda Tottenham za ta kara da RB Leipzig ta kasar Jamus.
Ana sa ran zai dawo filin atisaye a watan Afrilun bana, watanni biyu kafin fara gasar nahiyar kasashen Turai Euro 2020.