Manajan tsohon kwach na Real Madrid, Carlo Ancelotti, wanda aka kora jiya litinin, yace kungiyar tana shirin hayar kwach na kungiyar Napoli, Rafa Benitez, domin ya maye gurbin Ancelotti.
Jiya litinin shugaban gudanarwar kungiyar Real Madrid, Florentino Perez, ya bayyana korar Ancelotti, yana mai fadin cewa a mako mai zuwa zasu bayyana magajinsa. Sai dai bai yi karin haske a kan magajin ba, amma yace ya fi son mai magana da harshen Spaniyanci.
A makon da ya shige shafin tamaula na Goal.com ya bayyana cewa Benitez shi ne zabin Real Madrid a zaman sabon kwach idan har ta rabu da Ancelotti, kuma lokaci kadai ake jira kafin ya karbi ragamar kulob din.
A yanzu, manajan Ancelotti, Ernesto Bronzetti, yace yana da kwarin guiwar kashi 99 cikin 100 cewa Rafa Benitez zai zamo sabon kwach na Real Madrid.
Benitez ya lashe Coppa Italia a kakar kwallo ta bara, amma a kakar kwallo ta bana, bai tabuka abin a-zo-a-gani a birnin Naples ba, inda kungiyarsa ta Napoli zata kammala wasan bana a matsayi na 4.
An bayyana cewa wasu daga cikin ‘yan wasan Real Madrid sun fashe da kuka a lokacin da Ancelotti ya fada musu cewa an cire shi daga kan mukaminsa.