WASHINGTON D.C. —
Yan sandan kwantar da tarzoma a birnin Kisumu na kasar Kenya sun harba barkonan tsohuwa cikin kasuwa da ke cike da mutane, a kokarin tarwatsa mutane saboda dokar da gwamnati ta kafa don dakile yaduwar cutar Coronavirus.
Masu saye da sayarwa a kasuwar, cikin fushi, sun fada wa manema labarai cewa, suna sane da barazanar coronavirus, amma sun ce yawancin ‘yan kasar Kenya matalauta ne, suna bukatar su yi aiki domin samun abinci.
Suka ce idan har gwamnati tana son su zauna a gida, to dole ta basu kudaden da za su iya yin hakan.
Ya zuwa jiya Laraba, kasar Kenya tana da mutane 25 da aka tabbatar da sun kamu da Covid-19.