Britaniya ta bada umarnin rufe ofishin jakadancin Iran a London, ita kuma ta rufe ofishin jakadancin ta a Tehran, sakamakon harin da gungun mutane suka kai wa ofishin jakadancin ta dake helkwatar Farisa a jiya talata.
Sakataren harkokin wajen Ingila William Hague ne ya bada sanarwar tsaida wan nan shawara a zaman majalisa yau laraba.
Yace an baiwa ma’aikatan ofishin jakadancin Iran sao’I 48 da su bar Ingila.
William Haque yaci gaba da cewa “idan wata kasa ta hana mu aiki a cikin kasarta, kada su yi tsammanin su zasu sami sukunin aiki a kasarmu.
Haque ya kara da cewa matakin nan da Ingila ta dauka ba yana nufin ta yanke huldar difilomasiyya da Iran bane. Sai dai kamar yadda yace, hakan ya rage hulda da Iran zuwa wani matsayi mafi kankanci ta fuskar difilomasiyya.