Kungiyar kwallon kafa ta Barcelona, na kokarin cike gurbin dan wasanta Luiz Suarez.
Suarez na shirin tafiya jinyar tsawon wata hudu.
A dalilin hakan, rahotanni ke nuni da cewa, kungiyar wacce ke matsayi na daya a teburin gasar La Liga ta kasar Spain da maki 43, ta fara zawarcin Pierre-Emerick Aubameyang na Arsenal.
Kungiyar ta Barcelona na neman Aubameyang ne a matsayin a aro.
Sai dai bayanai sun yi nuni da cewa, Arsenal wacce ke matsayi na 10 a teburin gasar Premier Leage na Ingila da maki 30, ta fusata da yunkurin da Barcelonan ke yi na dauke mata dan wasa, kamar yadda jaridar Daily Trust ta ruwaito daga mujallar Goal.
A karshen kakar wasa mai zuwa, kwantiragin Aubameyang zai kare, amma ga dukkan alamu Arsenal na kokarin ci gaba da rike dan wasan.
A ‘yan kwanakin nan, Aubameyang ya kore raderadin da ake yi cewa zai bar Arsenal.
“Mutane sun cika kirkiro labarai na bogi, ni ina kaunar Arsenal.” Aubameyang ya ce.