‘Yan wasan Najeriya sun tashi kunnen doki a karawar da suka yi da Equatorial Guinea a gasar nahiyar Africa ta AFCON da ake yi a Ivory Coast a karo na 34.
An tashi a wasan da ci 1-1.
Wasan ya wakana ne a filin wasa na Abidjan, babban birnin kasar ta Ivory Coast.
Dan wasan Equatorial Guinea Ivan Salvador ne ya fara zura kwallo a ragar Najeriya a minti na 36.
Minti biyu bayan hakan dan wasan Najeriya Victor Osimhen ya farke kwallon.
Bangarorin biyu sun yi ta zubar damammaki a karawar, musamman ma ‘yan wasan Najeriya.
Najeriya za ta hadu da Ivory Coast a wasanta na biyu a wannan rukuni na ‘A’ a ranar 18 ga watan Janairu yayin da Equatorial Guinea kuma za ta fafata da Guinea-Bissau.
A ranar Asabar a wasan farkon bude gasar, Ivory Coast ta lallasa Guinea-Bissau da ci 2-0.