Jami’an yaki da fataucin miyagun kwayoyi a Najeriya, sun cafke wata mata ‘yar kasar Afirka ta kudu, da abinda ake zato cewa hodar ibilis ne wanda ta boye a rigar nono, wanda aka gano alokacin da ake bincikarta.
Ita dai wannan mata mai suna Likganyane Lerato, ‘yar shekaru 34, an cafke ta ne a filin jirgin saman Murtala Muhammad, dake Lagos akan hanyarta na zuwa Johannesburg, babban birnin kasar ta Afirka ta kudu.
Kwamandan hukumar yaki da fataucin miyagun kwayoyi mai kula da filin jirgin saman Murtala Muhammad dake Lagos, Ahmadu Garba, ya shedawa manema labarai cewa an kama ita wannan mata ‘yar kasar Afirka ta kudu, ne da abinda ake zargi cewa hodar ibilis ne mai nauyi kilo 1.210kg.
Lerato, tace abokai ne suka ja ta cikin wannan harkar, tana mai cewa wanda take yiwa aiki ne ya daukin nauyin tafiyar kuma ya yimata alkawarin $3,000 idan ta kai hodar ibilis din Johannesburg.