‘Yan wasan kwallon kafar Najeriya, zasu iya fuskantar matsaloli da dama a wasan da zasu gwabza da ‘yan wasan kwallon kafar Egypt, yau Talata. Hakan ya biyo bayan rashin lafiyar mai tsaron gida Carl Ikeme, wanda yake fama da ciwon ciki, har yasa bai samu dama buga wasa da abokan shi ba.
A tabakin likitan ‘yan wasan Dr. Ibrahim Gyaran, yace mai tsaron gidan yana fama da ciwon ciki, wanda hakan yasa bai iya buga wasa da abokan shi ba a ranar juma’a a garin Kaduna. Yace amma ya zuwa yanzu ya samu sauki, sai dai yana bukatar lokaci da zai huta kamun ya koma fili daga.
Shi kuwa shugaban klob din koc Samson Siasia, yace a gaskiya rashin mai tsaron gidan na su wata barazana ce ga wasan da zasu buga a yau, da ‘yan wasan kasar Egypt, a filin wasan Alexandria, yana ganin hakan kan iya zama sanadiyar rashin nasarar su a wasan na yau. Ya kara da cewar, lallai zamuyi rashin abokin wasa Carl, amma dai babu wata matsala tunda muna da hazikan ‘yan wasa wanda suka hada da Daniel Akpeyi, da Ikechukwu Ezenwa, kowannen cikin su, zai iya bada mamaki a wannan wasan na yau Talata.