WASHINGTON, DC —
Senegal ta doke Ghana da ci biyu da daya a wani wasan da ya burge kowa a gasar cin kofin kasashen Afirka, a bayan da dan wasan Senegal da ya shigo daga baya, Moussa Sow, ya jefa kwallo na biyu a daidai lokacin da alkalin wasa ke shirin hura tashi.
Sow ya narka wannan kwallo na biyu a bayan da tun farko Mame Biram Diouf ya ramawa Senegal kwallon bugun fenariti da Andrew Ayew ya jefa cikin raga kafin a tafi hutun rabin lokaci.
Wannan sakamakon babban abin dama-lissafi ne ga tsohon manajan Chelsea, Avram Grant, a wasansa na farko a zaman kwach na kasar Ghana. Yanzu kasar Ghana ta shiga hali na tsaka mai wuya a kokarin hayewa zuwa zagaye na biyu daga wannan rukuni nasu.