A ci gaba da bayanin abubuwa guda 10 da suka girgiza duniyar kwallon kafa a shekarar 2014, kamar yadda editocin GOAL.COM suka zaba, a lamba ta 9:
Yadda aka yi har kungiyar Liverpool, wadda take gaba da ci 3-0, ta kyale Crystal Palace ta rama wadannan kwallaye har 3, aka tashi kunnen doki a wasan da suka buga na Firimiya Lig.
Koda yake a bana din, an yi ta maganganu a kan faduwar da Steven Gerrard, kyaftin na Liverpool yayi har Demba Ba na kungiyar Chelsea ya samu kwallo ya jefa a raga, matakin da ya hana Liverpool zamowa zakarun Firimiya Lig, ya taimakawa Manchester City ta zamo zakara.
Amma babban abinda ya zamo sinadarin warwarewar alkadarin Liverpool a bana, shi ne yadda har ta bari 'yan wasan Palace suka rama kwallaye guda uku da ta jefa musu. Wannan shi ne ya zamo harsashin koma-bayan Liverpool, kuma shi ne editocin GOAL.COM suka zaba a zaman abu na 9 da ya hautsina duniyar kwallon kafa a 2014.