A cigaba da saye da sayarwa da akeyi na 'yan wasan kwallon kafa a watan Janairu 2019, da zummar gyare-gyare a kulob kulob don kammala gasar kakar wasan bana.

Kungiyar kwallon Kafa ta Chelsea tana kan tattaunawa domin dauko dan wasan gaba na Juventus, dan kasar Ajantina mai suna Gonzalo Higuain mai shekaru 31, da haihuwa a matsayin aro kafin karshen kakar wasan bana.

Sai dai Kungiyar ta Juventus tana shirin sayan dan wasan kulob din AC Milan a mazaunin na din din-din, kasan cewar a yanzu haka yana zaman aro ne a hannun AC Milan.

Har ila yau kungiyar ta Chelsea tayi watsi da bukatar kungiyar Barcelona da tayi kan dan wasanta Willian, mai shekaru 30 da haihuwa, inda Barcelona tace zata bada kudi kuma ta hada da dan wasanta Malcom ga Chelsea cikin cinikin Willian.

Rahotanni sun bayyana cewar kungiyar Barcelona na duba yuwar sayar da dan wasanta Philippe Coutinho, mai shekaru 26 a duniya don ganin ta dawo da tsohon dan wasanta Neymar, wanda ta sayar wa kungiyar Paris Saint Germain a shekarun baya.

Ita kuwa Bayern Munich ta kasar Jamus tana kan tattaunawa da dan wasan tsakiya na Paris-saint Germain mai suna Adrien Rabiot, mai shekaru 23 a duniya na ganin ta dauko dan wasan, wanda ake alakanta shi da komawa Barcelona, a matsayin kyautar (Free Transfer) a karshen kakar wasan bana.

Matashin dan wasan gefe na Borussia Dortmund mai shekaru 18, dan kasar Ingila Jadon Sancho yace yana so ya cigaba da zama a kungiyrsa maimakon komawa tsohowar kungiyarsa ta Manchester City inda ake alakantashi da komawa kungiyar.

Kungiyar Everton tana daya daga cikin kungiyoyin da suke zawarcin dan wasan Chelsea Michy Batshuayi mai shekaru 24, da haihuwa wanda yanzu haka yake zaman aro a kungiyar Valencia.