A shirinmu na nishadi a yau dandalinvoa ya samu zantawa da Mubarak M K wanda aka fi sani da MK mawakin rap watau zaurance, wanda ya shafe shekaru yana yi, ya kuma fitar da wata wakarsa mai suna ‘Talatu’ wakar da ya rera ba tare da ya rubuta ta ba ko me ya sa shi yin hakan.
MK ya ce wakar ta zo masa ne kawai inda ya ga bukatuwar amfanin da sunan gargajiya , a lokacin da basirar ta zo masa sai ya shiga studio, ba tare da rubuta ta ba ya fara rero baitocin wanda daga bisani ya lura wakar tayi ma’ana.
Ya kara da cewa wannan ne karon farko da ya rera waka ba tare da ya rubuta ta ba, kamar yadda akan ce yau da gobe ta wuce wasa, yana shiga studio sai baitocin suka rika zuwan masa kamar wahayi, har ya sami kammala wakar.
MK ya Kuma ce yana fata a gaba zai dinga sirkawa da yin wakokin da zarar basirar sun zo masa a kwakwalwa ba tare da ya rubuta su ba.
Ya ce fatansa da burinsa bai wuce ya cigaba a harkar waka ba duba da yadda da zarar ya fita sai mutane su rika cewa ai naji wakarka jiya MK hakan na kayata shi tare da bashi kwarin guiwa.
