Tsohon dan wasan gaba na kwallon kafar kasar Afrika ta kudu Phil Masinga, ya mutu.

Dan wasan ya mutu yana da shekaru 49 a duniya, sakamakon cutar kansa.

Dan wasan Phil Masinga ya buga wasa a kungiyar kwallon kafa ta Leed United, daga shekara ta 1994 zuwa 1996, tare da tsohon Kaftin din kasar Afrika ta kudu Lucas Radebe, kafin daga bisani ya koma St Gallen, na kasar Switzerland.

Ya fara buga wasa ma tawagar Afrika ta Kudu a shekara 1992, a wasan da sukayi da Kamaru, haka kuma yana cikin 'yan wasan da suka fafata a gasar cin kofin 1996.

Shugaban hukumar kwallon kafa ta Afrika ta Kudu Danny Jordaan, ya bayyana cewar wannan rashi, babban rashine a bangaren kwallon kafar kasar dama Afrika baki daya.