Kafar yada labaran kasar Korea ta Arewa, ta ruwaito cewa, Shugaba Trump ya aikawa da takwaran aikinsa na Korea ta Arewa wata wasika kuma yana nazari kan abin da wasikar ta kunsa.

Kamfanin dillancin labaran kasar ta Korea ta Arewa, ya wallafa wani hoto, wanda ya nuna Shugaba Kim cikin wani yanayi na zurfin tunani, yana rike da wasikar, wacce ga dukkan alamu ke dauke da hatimin Fadar White House.

Rahotan ya kuma ruwaito Kim yana yaba abin da ke kunshe a wasikar, wanda ya kwatanta a matsayin “abu mai matukar kyau.”

Sai dai bai yi wani karin haske kan takamaiman abin da ke cikin wasikar ba.

A farkon watan nan ne, shi ma Shugaba Trump ya bayyana cewa ya samu wata wasika da ta dadada mai rai, wacce ke kunshe da kalamai masu dadi.

Ko da yake, an samu cikas a tattaunawar da bangarorin biyu suka yi a birnin Hanoi da ke Vietnam, dangane da batun nukiliya.

Amma duk da haka, shugabannin biyu sun ci gaba da musayar wasiku da hotuna a tsakaninsu, inda har ma suka bayyana cewa suna da kyakkyawar dangantaka a tsakaninsu.