Shugabannin Tarayyar Turai wadanda suke zaman shawarwari a Brussels sun ce ba zasu janye takunkumin karya tattalin arziki da suka azawa Rasha ba, har sai an aiwatar da yarjejeniyar tsagaita wutar baki daya wacce Rasha ta amince da ita, a kokarin da ake na kawo karshen rikicin da ake a gabashin Ukraine wacce yaki ya daidaita.
Shugaban kungiyar Donald Tusk ne ya bada sanarwar haka a daren jiya Alhamis. Yace sanarwar ta nuna matsayar kungiyar mai wakilai 28 na ci gaba da matsin lamba kan Rasha ta kawo karshen goyon bayan da take baiwa 'yan awaren Ukraine din, a tada kayar bayan da suke yi har mutane fiyeda dubu shida suka halaka cikin watanni 11 da suka wuce.
Moscow dai tana ci gaba da karyata cewa tana baiwa 'yan tawayen taimako kai tsaye a yankinda galibin jama'arta dake kan iyakar kasashen biyu masu magana da harshen Rasha ne.
Tarayyar Turai ta fara azawa Rasha takunkumi ne bayan da masu bincike suka danganta makamai masu linzami da aka yi amfani dasu wajen harbo jirgin Fasinjan kasar Malaysia a yankin Ukraine. Fadar Kremlin ta shugaban Rasha ta musanta tana da hanu a harbo jirgin wanda yake dauke da mutane 298.
