Ana kyautata tsammanin Taiwo Awoniyi yayi tafiya zuwa Ingila cikin wannan makon, domin kungiyar Liverpool ta yi gwadon lafiyarsa, akokarin shirin komar da shi kulob din na Firimiya Lig.
Kasancewar wannan ci gaba da aka samu, ‘dan wasa matashin ba lalle bane ace zai samu damar buga wasan da za’ayi a kasar Congo na kasashen Afirka a wata mai zuwa.
Mai magana da yawun kungiyar matasan Najeriya ‘yan kasa da shekaru 23 wato U-23 Timi Ebikagboro, yace “Taiwo Awoniyi zai tafi Ingila domin rattaba hannu kan kwantiraginsa da kungiyar Liverpool, wannan shine dalilin dayasa baya tare damu a wasannin motsa jiki da shirye shiryen wasannin kasashen Afirka da zamu yi.”
‘dan wasan mai 18 da haihuwa dai ana kyautata tsammanin zai rattaba hannu kan kwantiragi da Liverpool, amma kungiyar dai zata bayar da shi bashi ga wasu kungiyoyin wajen Ingila. Kamar yadda kungiyoyi kamar su Monaco da FC Porto da Red Bull Salzburg ke nuna bukatar su kan ‘dan wasan.
