Shugaban kungiyar Taliban ya ce Amurka zata yi babban kuskure idan ta ‘kara yawan sojojinta a kasar ta Afghanistan don ta yaki mayakanta, wadanda suka lashi takobin cewa ba zasu taba daina fafutika ba sai ranar da suka ga bayan daukacin dukkan sojojin kasashen ketare dake kasar.
Maulavi Haibatullah Akhunzadah, ya yi wannan kalaman ne a yau Juma’a, a wani sako da ya fitar kafin shagalin Sallah da za’ayi a karshen watan Azumin Ramadan.
Yace “Idan kuna tunanin zaku ‘karya lagonmu kasancewar kun zuba sojoji masu yawa, kuna yin kuskure! Wannan ba ita bace hanyar warware matsalar ba.”
Shugaban ya kuma yi gargadi kan cewa sojojin Amurka ba zasu taimaka wajen samar da zaman lafiya ba sai dai su ‘kara rikita lamarin'.
Ya kuma ci gaba inda ya zargi sojojin ‘kasashen waje da laifin hana ruwa gudu a kokarin samar da zaman lafiya a Afghanistan. Taliban tana bukatar sojojin kungiyar tsaro ta NATO su bar ‘kasar kafin ta amince da wani zaman tattaunawa.
A kwanan nan ne shugaba Donald Trump, ya amincewa sakataren tsaron Amurka Jim Mattis, ya ‘kara aika dubban sojoji zuwa Afghanistan kan 8,400 da ake da su yanzu haka. Aikinsu shine horarwa da kuma baiwa dakarun ‘kasar shawara, wadanda ke fama wajen shawo kan kungiyar Taliban.
Facebook Forum