Babbar Kotun da ke sauraren karar da aka shigar da tsohon gwamnan jihar Kogi Yahaya Bello a Abuja kan zargin sama da fadi da kudaden jihar, ta saka ranar 10 ga watan Disamba a matsayin ranar da za ta yanke hukunci kan ko za ta ba da belinsa.
Tsohon gwamnan na Kogi wanda yake tsare a ofishin EFCC a Abuja, na fuskantar tuhuma kan badakalar Naira biliyan 80 da ake zargin ya wawure na jihar a lokacin mulkinsa.
An kuma shigar da wata sabuwar tuhuma kan wawure Naira biliyan 110 – tuhume-tuhumen da duk ya musanta.
A zaman da kotun ta yi a ranar Juma’a kamar yadda kafar talabijin ta kasa NTA ta ruwaito, Mai Shari’a Maryann Anenih, ta ce a ci gaba da tsare Bello da sauran mukarrabansa da ake tuhuma har sai ranar ta 10 ga watan Dismba.
A baya an yi ta wasan buya tsakanin Bello da hukumar EFCC da ta shigar da karar shi kan wawure kudaden.
Sai a farkon makon nan ne hukumar ta EFCC ta kama Bello bayan da ya mika kansa.
Dandalin Mu Tattauna