Rahotanni daga kungiyar kwallon kafa ta Real Madrid na bayyana cewar dan wasanta Marco Asensio, ya samu rauni a wasan da suka yi da Arsenal na sharar fage.

Dan wasan Marco Asensio mai shekaru 23 da haihuwa dan kasar Spain ya samu rauni ne cikin mintuna 65 bayan dawo daga hutun rabin lokaci, inda aka fita dashi a kan abun daukar maras lafiya (stretcher) sakamakon rauni da ya samu a gwiwar hagunsa.

Dan wasan dai shi ya jefa kwallo ta biyu da ya rama wa kungiyar ta Real Madrid da suka tashi 2-2 da Arsenal a ranar Laraba 24, ga watan Yulin 2019, inda Real ta samu nasara a wasan da ta ci 3 da 2 a bugun daga kai sai mai tsaron gida.

Sakamakon wannan raunin da Asensio, ya samu ba zai samu damar buga sauran wasan da Real za tayi ba na sharar fage a Amurka ba.

Ana tsammanin dan wasan zai iya tafiya jinyar kusan watanni Tara, wanda hakan na iya shafar kasar sa Spain a gasar cin kofin kasashen Turai na 2020, indai har sun samu tikitin shiga.