A bangaren saye da sayarwar 'yan wasan kwallon kafa na duniya da akeyi, kungiyar Real Madrid tace a shirye take ta bayar da dan wasanta Gareth
Bale, mai shekara 29 da haihuwa domin dauko Paul Pogba dan shekaru 26 a duniya daga Manchester United.

Ita kuwa Manchester United zata biya fam miliyan 90 idan har tana son sayen dan wasan baya na Leicester City Harry Maguire, mai shekara 26 a duniya inda dan wasan dan kasar Ingila zai kasance dan wasan baya mafi tsada a tarihi, in har an saye shi akan wadannan kudaden.

Wasu rahotanni sun bayyana cewar kungiyar kwallon kafa ta Crystal Palace ba ta son sayar wa Arsenal dan wasanta Wilfried Zaha, mai shekara 26 a duniya bayan da Arsenal ta matsa lamba wajan ganin ta dauko dan wasan a kakar wasa ta bana.

Akwai yiwuwar dan wasan Arsenal Alexandre Lacazette, mai shekara 28 da haihuwa, zai bar Arsenal kafin rufe hada hadar saye da sayarwa 'yan wasa, kamar yadda mujallar Express ta ruwaito.