Tsohon dan wasan kwallon kafa kuma mai sharhi akan kwallon kafa Jamie Redknapp, yace babu shakka kungiyar kwallon Arsenal na bukatar dan wasan tsakiya irin dan wasan kungiyar Leicester City Wilfred Ndidi, da kungiyar ta dade tana muradin samu.

A wasan da aka yi ranar Asabar din da ta gabata a filin wasan King Power, an tashi da ci 2-0, inda kungiyar Arsenal ta sha kashi. Dan wasan Ndidi, mai shekaru 22 da haihuwa ya taka muhimiyar rawa wajen ganin samun nasarar kungiyar.

Shi dai dan wasan wanda asalinsa dan Najeriya ne, yanzu haka ya shiga cikin jerin zaratan taurari masu taka leda da babu kamar su a kungiyoyin kasashen Turai. Tsohon kaftin din kungiyar Liverpool Redknapp na da yakinn cewar dan Najeriya na iya kawo karshen duk wata matsala da kungiyar Arsenal ke ciki musamman wadda ta shafi rufe tsakiyar fili.

Hazikin dan wasa shine kuma mai kananan shekaru, ga shi kuma iya bada kwallo akan lokaci, babu wata kungiya da ba za ta so shi ba.