Mai horas da kungiyar kwallon kafa ta Arsenal Unai Emery ya karyata rade radin da akeyi na cewar Arsenal ta na da shirin sayen mai tsaron ragar Real Madrid, Keylor Navas a wannan watan Janairu 2019.

Navas mai shekara 32, da haihuwa an alakantashi da komawa taka-leda a kungiyar ta Arsenal, tun bayan da Real ta saye tsohon mai tsaron raga na Chelsea, Thibaut Courtois.

Arsenal dai a farkon kakar wasan bana ta sayo mai tsaron raga Bernd Leno
kan kudi fam miliyan £22.

Inda wasu ke ganin Leno mai shekara 26 yana iya kokarinsa a
wasu wasannin, amma a wasu lokutan yana sakaci wajen barin kwallaye na shiga ragarsa.

Kocin Emery ya ce shi kam a nasa bangaren ya gamsu da yadda masu tsaron ragar na Arsenal uku ke kamunsu, kuma kulob din ba su da niyar sayo mai tsaron raga a yanzu haka.

Arsenal dai ta jera wasanni 22 ba tare da an doke taba a wasannin ta na bana kafin Liverpool ta lallasa ta daci 5-1 a wasan firimiya lig.