Mai horar da kungiyar kwallon kafa ta Akwa United a tarayyar Najeriya Abdullahi Maikaba,
yace yana da kwarin Guiwar cewar kungiyarsa ta Akwa zata lashe gasar Firimiya lig (NPFL) na bana 2016/17.
Akwa a yanzu haka ta na matsayi na uku ne a saman teburin NPFL da maki 51 a mako na 32,
Plateau United ta wuce ta da maki 7 a mataki na daya, da maki 58, Mountain of Fire and Miracle dake legas tana mataki na biyu ne da maki 55.
A satin mako na 32 da ya wuce Kungiyar El-kanemi dake Maiduguri ta doke Akwa da kwallon daya da babu a garin Borno, inda ta yi mata cikas cikin jerin wasanninta 4 da tayi ba tare da an doke ta ba. amman duk da haka Akwa tana mataki na uku, a gasar ta NPFL.
Tsohon mai horar da kungiyar kwallon kafa ta Wikki Tourist dake Bauchi, Maikaba ya ce duk da yake saura wasanni shida kacal a kammala gasar Firimiyan Najeriya na bana 2016/17, kungiyar ta Akwa zata iya samun nasara a wasanni uku a Jere wanda hakan zai basu damar haurawa matsayi na daya a teburin.
Duk da cewar a yanzu haka akwai ‘yan wasansa guda 4 da suke cikin jerin ‘yan wasa kwararru na cikin gida da Super Eagles ta daukesu, don buga wa kasar wasan neman Gurbin shiga gasar (CHAN 2018) tsakanin Najeriya da Kasar Benin a wannan watan.
‘Yan wasan sun hada da maitsaron baya Emanuel Ariwachuku,Alhasan Ibrahim, Hafiz Aremu, sai Ifeanyi Ifeanyi,
Abdullahi Maikaba ya kara da cewar yana da ‘yan wasan da zasu maye gurbin wadannan mutane, kuma hakan zai ba wasu ‘yan wasan suma damar nuna kansu.
Wasan da kungiyar ta Akwa zata buga guda ukku sune da Sunshine a waje, Niger Tornadoes a gida da kuma Ifeanyi Ubah a waje.
A yanzu haka Abdullahi Maikaba yana cikin jerin manyan masu horar da ‘yan wasan kwallon kafa na NPFL, inda a kakar wasan da ta wuce 2015/16 ya jagoranci kungiyar Wikki Tourist na garin Bauchi ta kare a matsayi na uku a Firimiyan Najeriya.inda ta wakilci kasar a gasar CAF.
Facebook Forum