WASHINGTON D.C. —
Garin Bachama a jihar Adamawa
Gwamnan jihar Adamawa Ahmadu Fintiri ya ayyana kwana 3 domin zaman makokin Hama Bachama, Honest Stepen, basaraken masarautar Bachama da ke jihar.
Gwamnan ya bayar da wannan umurnin ne a cikin wata sanarwar da sakatarensa kan yada labarai Humwashi Wonosikou ya fitar a Yola.
A cewar sanarwar "za a sassauta dukannin tutoci a jihar daga ranar 29 na wannan watan zuwa 1 ga watan Yuli."
Hama Bachama mai shekaru 66, ya rasu ne a safiyar Lahadi a garin Numan bayan yayi fama da wani rashin lafiya.
Ya hau karagar mulki ne tun a shekarar 2012, kuma shi ne sarkin Bachama na 28.
An yi jana'izar marigayi Bachama a daren 28 ga watan Yuni a garin Lamurde da ke masarautar Bachama.
Facebook Forum