A jiya litinin da yamma, a karo na biyu cikin sati daya shafin zumunta na facebook, yasamu wata ‘yar-tangarda, wadda ta sa mutane da dama basu iya shiga shafin zumuntar, na tsawon wasu awowi. Wannan yasa hannun jarin kamfanin ya sauka da kashi hudu 4%, akan kudi dallar Amurka $89.25 dai-dai da naira dubu goma sha takwas 18,000, a kasuwar cinikayya.
A rahoton da wani shafi Downdetector.com, ya fitar dake lura da irin katsalandan din da shafin kamfanin ya fuskanta, ya nuna cewar anfi samun wannan matsalar ne a yankin arewacin kasar Amurka. A wannan tsakanin, shafin na wayar hannu shima ya dena aiki wanda bangaren sakon gaggawa ne kawai yayi aiki a lokacin.
Mutane da dama idan sukayi kokarin shiga shafin, sai ace musu kuyi hakuri wani abu na tafiya ba dai-dai ba a shafin. Hakama a ranar Alhamis da ta gabata, hakan ya faru wanda ya shafi kasashe yankin Turai, India, da Australia.
