WASHINGTON, DC —
Duk da cewa har yanzu hukumar zabe ta INEC a Jihar Kaduna ba ta fito ta ce ga wanda ya lashe zaben gwamnan da aka yi a jihar ba, rahotanni na cewa gwamna Mukhtar Ramalan Yero ya buga waya ma abokin hamayyarsa na jam'iyyar APC, Malam Nasiru el-Rufa'i yana taya shi murnar nasarar da ya samu.
Samuel Aruwan, kakakin majalisar yakin neman zaben gwamna na jma'iyyar APC a Jihar Kaduna shi ne ya sanar da cewa gwamna Yero ya buga ma el-Rufa'i wayar da misalin karfe 3 na la'asar yana taya shi murna.
Yace Malam el-Rufa'i ya godewa wa gwamnan da wannan karimci da ya nuna na buga masa waya don taya shi murna.
Kamar yadda muka fadi dai, har yanzu hukumar zabe ba ta ce ga wanda ya lashe zaben na Jihar Kaduna ba.