Burin Liverpool na ganin ta lashe kofin gasar Premier na bana ya kara dishewa bayan da ta tashi ci biyu da biyu da West Ham a wasan da suka kara a ranar Asabar.
Yanzu haka kungiyar ta Liverpool tana dingisawa don ganin ta kai ga gaci yayin da kocinta Jurgen Klopp ke shirin barin kungiyar a karshen wannan kakar wasa.
Liverpool ta yi nasara a wasa daya ne tak cikin wasanni biyar da ta buga a baya-bayan nan.
Wannan kunnen doki da kungiyar ta Liverpool ta yi da West Ham ya sa yanzu tana zaune a matsayi na uku a teburin gasar ta Premier.
Wani abu da ya kara fito da matsalar cikin gida da kungiyar take fuskanta shi ne musayar kalamai da aka yi tsakanin Mohamed Salah da kocins Klopp, lamarin da sai da dan Darwin Nunez ya shiga tsakaninsu a daidai lokacin da ake shirin yin canji ‘yan wasan.
Ba a san dai mai ya janyo fadan ba, amma dukkan alamu sun nuna cewa kowa cikin bacin rai yake magana a hotunan bidiyon da aka nuna wasan na Liverpool da West Ham.
Dandalin Mu Tattauna